\_sh v3.0  400  Text
\_DateStampHasFourDigitYear

\ref CORD23.002
\tx Ie jira mei ua beno ua eikome, beno ua moo, jiibina dɨona jira ua
¿nɨɨe izoi bie ite kaɨ iyano?

\ref CORD23.003
\tx Mei kaɨ iyano daanɨ kaɨ uai ite, daanɨ kaɨ jiibina uai, dɨona uaido
uuritɨkue.

\ref CORD23.004
\tx Ie meinona ¿buu mei ua oreka bie ikɨrafue, bie uazikɨ uai,
yagueroiya uai?, ¿buu mei oreka?

\ref CORD23.005
\tx ¿Mɨnɨka mei eroikana ua makadɨomoɨ?, ¿mɨnɨka ua
kakareidoɨdɨomoɨ?

\ref CORD23.006
\tx Beno omoɨ ikɨrafue iñede, beno omoɨ uai igaɨ iñede.

\ref CORD23.007
\tx ¿Mɨnɨka jenodɨomoɨ?, yoiri, daɨde, kue onoiyeza.

\ref CORD23.008
\tx ¿Taɨnomo buu makañede?, ¿taɨnomo buu jɨaɨmɨe ikɨnide?, ¿nɨbai
daɨitadɨomoɨ?

\ref CORD23.009
\tx Meita fɨenide uaina kakade uzuma, daɨde, nɨɨ mei ua beno naama.

\ref CORD23.010
\tx Ie jira kue jɨaɨmakɨ jitokome jetañedɨkue, jɨaɨmakɨ jitaɨngona kue
jetañedɨkue, kueɨe mei jeruirede.

\ref CORD23.011
\tx Ie izoi einamakɨ ie jitokome jitaɨngo jɨaɨ jeruirede, meita kue abɨna
iziruitɨkue.

\ref CORD23.012
\tx Ie izoi ¿buu mei abɨna iziruiñena?, ¿buu mei abɨna rairuiñena?

\ref CORD23.013
\tx Nana izirede, jaɨenikɨ izirede, eirɨngo izirede, eikome izirede, kaɨ
aama izirede, kaɨ ei izirede, kaɨ mirɨngo izirede.

\ref CORD23.014
\tx Ie izoi einamakɨ jitaɨngo ite, jitokome ite, jaɨenikɨ ite, ua ¿nɨɨe izoi
ua ite?, daɨde.

\ref CORD23.015
\tx ¿Mɨnɨka mei ua jenokano uitɨomoɨ?, ua ¿mɨnɨka ua eroikano ua
makadɨomoɨ?, omoɨ yoiri, daɨde.

\ref CORD23.016
\tx Beno urue kueɨe, daɨde, kue urue aruire ɨnɨde, daɨde, kue rɨngoza
aruire ɨnɨde, daɨde.

\ref CORD23.017
\tx ¿Nɨnomona?, ¿buu komekɨmona?, ¿buu yagueroiya?, ¿buu ebena
uriya?, fɨenide.

\ref CORD23.018
\tx Ie mei omoɨ yoiri, daɨde, nia fɨgo ite, omoɨ yoñenia mei fɨenide.

\ref CORD23.019
\tx Jaemona be daɨi jɨaɨma komekɨ fɨeni fɨnokana uitɨomoɨ.

\ref CORD23.020
\tx Omoɨ mei daɨitana buuna iñede, ua taɨnomona ua jɨaɨma raa
jetanide.

\ref CORD23.021
\tx Jetaja ɨba kome ote, jetañenia jetañega, ie jira jɨkanoga.

\ref CORD23.022
\tx ¿Buu jaka ebena jetañeiri?, jɨaɨma raa naamarede, naamamona
izirede.

\ref CORD23.023
\tx Fɨgo abɨna onoitɨomoɨ, jɨaɨma raa jetadɨmɨe baɨfene fɨenide.

\ref CORD23.024
\tx Akie izoide.

\ref CORD23.025
\tx ¿Buu oreka benomo urizaɨbide?, ¿buu okuika?

\ref CORD23.026
\tx Fia makadɨkaɨ, omoɨ daɨiñeno iri.

\ref CORD23.027
\tx Jaka ite rafue, daɨde, iñedenia mei uriñedɨomoɨ, koni omoɨ yoia
abɨna onodɨomoɨ, omoɨ yoia akɨ baitadɨomoɨ, omoɨ yoia akɨ omoɨ
ziiñodɨomoɨ, abɨna onodɨkaɨ daɨdɨomoɨ.

\ref CORD23.028
\tx ¿Nɨeze itɨomoɨ birui ebena uriya?

\ref CORD23.029
\tx Taɨno yotɨomoɨ.

\ref CORD23.030
\tx Jae einamakɨ daɨi uurite einamakɨ fuite, jae yagueroide eikome oni
baɨide, yagueroide eirɨngo oni baɨide, fɨeni fuite, nɨkaɨbite, ɨbabite,
fɨenina baɨfene.

\ref CORD23.031
\tx Ie jira birui afe izoi uuritɨmɨe mei daaje izoide.

\ref CORD23.032
\tx Manue uaido uuritɨmɨe jaka ua nɨkaɨbite.

\ref CORD23.033
\tx Koni jae einamakɨ joriaɨ naanɨ, ukukaɨ naanɨ, uuna naanɨ, kɨtobena
naanɨ, ie iadɨ einamakɨ jaka nɨkaɨbite.

\ref CORD23.034
\tx Afe ɨkoɨ fɨeni fuite, ebena uriya baɨfene ie izoide, daɨde.

\ref CORD23.035
\tx Ie jira omoɨ yoiri, daɨde, omoɨ yoñenia mei baɨfene jaka ua ɨba
ite, yagueroido uurite izido dɨetaka, yagueroikano makade ua
baɨfene jaka dɨe tooide.

\ref CORD23.036
\tx Akie izoide ¿nɨeze omoɨ uriri?, ¿Buumo jitaitɨomoɨ?, buuna iñede,
daɨde.

\ref CORD23.037
\tx Jae bie enɨedona kue jaaidɨkue iadɨ kakañedɨkue, jiyakɨmo
jaaidɨkue iadɨ kakañedɨkue, ifofenemo jaaidɨkue iadɨ kakañedɨkue,
ie mei, ¿nɨnomona?

\ref CORD23.038
\tx Ie jira naama jɨkanoga, jɨkanoga rafue yoga, daɨde, rairuiñega.

\ref CORD23.039
\tx Akie izoide jaemona jaka daɨi uuritɨomoɨ, omoɨ ja kue daɨiri.

\ref CORD23.040
\tx Bie izoi jaka jɨaɨma komekɨ jɨfuekano uitɨomoɨ, jɨaɨma janokana
uitɨomoɨ, jaeita.

\ref CORD23.041
\tx Kue uruedɨkueita kue omoɨ jɨfueiri, kuekoni ja eikomedɨkue.

\ref CORD23.042
\tx Fia dɨnomona uriñedɨkue, iya eroikana, ie jira kue uriya, kue
jɨkanua, ie jira omoɨ yoyena, janoñeno iri, baɨfene fɨenide.

\ref CORD23.043
\tx Akie izoide kakareitɨkue, kue jefo kakaide, kue ui kɨoide.

\ref CORD23.044
\tx Akie izoikana ite uaido birui kue uriya omoɨ yoyena, ¿buu
ameodɨkue daɨna?, ¿buu jairifodɨkue daɨna?, ¿buu jɨkodɨkue daɨna?

\ref CORD23.045
\tx Akie izoide jɨkanotɨkue, iemo omoɨ yoñeniadɨ jabe afenomo kue
erokaiye yezika ja monaitɨomoɨ, kue mei jaka mei jeruiñedɨkue, bie
einamakɨ jitokome kue daɨiñedɨkue, bie einamakɨ jitaɨngo
daɨiñedɨkue, mei yagueroiya ɨba.

\ref CORD23.046
\tx Akie izoikano ja mei ua kue uai jino baɨide, iya eroikana.

\ref CORD23.047
\tx Jae omoɨ yotɨkue, yotɨkue ɨɨnoñedɨomoɨ, meita yetarafue iñede,
yetarafue ɨɨnotɨmɨe ñue ɨnɨde, ¿yetarafue ɨɨnotɨmɨena buu
ikɨñede?, ¿imɨena buu faidoñede?

\ref CORD23.048
\tx Ie mei yetarafuena ɨɨnoñedɨmɨe jaka mei ua fajano dotaka, jaka
ua monaide.

\ref CORD23.049
\tx Idɨ uai bifori mei uriya, fɨgo iri, daɨde, dɨga taɨno uai dukɨide,
daɨde, ebena dukɨide, yaguefuena dukɨide, ikɨrafuena dukɨide,
yikɨfuena dukɨide, ɨnɨaɨkɨna dukɨide.

\ref CORD23.050
\tx Dɨnomona jɨaɨma komekɨ feeide.

\ref CORD23.051
\tx Ie jira eikome uriya.