\_sh v3.0  400  Text
\_DateStampHasFourDigitYear

\ref CORD19.002
\tx Nɨɨ mei ua meine ua ñue rafuena itɨno, ñue meine fɨnoda
joonega.

\ref CORD19.003
\tx Mei rafue ua jinoñede, ua rafue ɨenide, rafue ua raana eroiñede.

\ref CORD19.004
\tx Ie iadɨ ba eikomemona rafue mei ñuera, eirɨngomona rafue mei
ñuera.

\ref CORD19.005
\tx Ie mei uruiaɨ rafuena mei naɨ onoñede, ie jira jaka ua fɨenidena
eroide.

\ref CORD19.006
\tx Meita daama ba abɨna onodɨmɨe, afemɨemona mei fɨgora,
afengomona mei bie fɨgora.

\ref CORD19.007
\tx Jaka mei ua daɨita eroikana raa komuide.

\ref CORD19.008
\tx Bene ua ikɨrafuena ite, bene ua taɨnofuena ite, ie kɨgɨmo rafue
ñue joonega.

\ref CORD19.009
\tx ¿Mɨnɨka mei rafuena iya?, mei rafuena ite ua farekatofe, rafuena
ite rozidoro, dunajɨ, jakaijɨ, refijɨ, jifirai, mazakarɨ, nɨɨ eiño rafue,
eiño komekɨ ifue.

\ref CORD19.010
\tx Ie ñue jooneia mei ja komuide, ie mei ñue jooneñenia mei
komuiñede.

\ref CORD19.011
\tx Fui mei ua ¿mɨnɨka nia yote?, nɨɨ mei yoyena komuitate.

\ref CORD19.012
\tx Meita akɨ dɨno naɨ uruiaɨ onoiñede, naɨ uruiaɨ: fia ua bie nɨbaɨ ua
jɨfanua, daɨde.

\ref CORD19.013
\tx Meita eirɨngomona mei uafue, eikomemona uafue, iedo uruiaɨ fui
onoite, rɨngoza onoite, biedo jae eiño kaɨ komuitate, biedo
mooma kaɨ kaadote, daɨde.

\ref CORD19.014
\tx Nɨɨ mei rafuena ite ñue ua meine abɨdo joonia uai.

\ref CORD19.015
\tx Nana mei ua daaruido rafue ñue ua joobiñede, fɨɨa joobite, fɨɨa
ñuezite.

\ref CORD19.016
\tx Meita jɨaɨma ifue ite, oni ba jɨaɨmɨe ifue jaka ite.

\ref CORD19.017
\tx Ie mei ua danomo atɨda ñue joonega, ifuena ja fui ua yoyɨfuena
mei ua ite.

\ref CORD19.018
\tx Kaɨ ¿mɨnɨkado mei komuidɨkaɨ?, ñuefue, daɨde.

\ref CORD19.019
\tx Ie jira afengo uruiaɨ komuiya eroikano eirɨngo ñue ua joonekana
atɨde.

\ref CORD19.020
\tx ¿Buu mei kaɨri daɨi ñue jooneite?, jabe ua kaɨri rafue ñue fɨnoite,
ua eikome biteita, eirɨngo biteita mei kaɨ okuiri, daɨde.

\ref CORD19.021
\tx Nɨɨ birui kaɨmo mei eikomena birui kaɨ iya, birui eirɨngona
mameide kaɨ irai fue ingo ite.

\ref CORD19.022
\tx Ie jira mei ñue ja kaɨ afe guita kaɨmare ja komuidɨkaɨ, kaɨmare
ɨnɨdɨkaɨ.

\ref CORD19.023
\tx Abɨna onokano kaɨ jaaiya rafue.

\ref CORD19.024
\tx ¿Nɨɨe izoi mei afeno ua rafue ñuera daɨna mei kaɨ onoɨmo
komuide, ie mei ñuera uai, ñuera rafue?, daɨdɨkaɨ, jɨaɨmɨe ie
uaiñede.

\ref CORD19.025
\tx Ie jira bie izoikano iya eroikano komedɨkueita ua abɨ kue zooferi
daɨnanona, komedɨkueita ua taɨno uaido kue uriri daɨnanona.

\ref CORD19.026
\tx Ie jira akɨ dɨnomona ja ua raana fɨnokano uite, raana jenokano
uite.

\ref CORD19.027
\tx Nɨɨ ua kaɨ ua iyano, nɨɨ kaɨ ua maɨrie, ñuefue jenokano uite,
baikano uite, monaitakano uite.

\ref CORD19.028
\tx Ie yezika mei ua ñue kaɨ komekɨ eroide, ñue kaɨ ɨfokɨ uurite.

\ref CORD19.029
\tx Jae mei einamakɨ ua fɨnokana atɨka ñuefue, guiyafue, birui mei
kaɨmo iñede.

\ref CORD19.030
\tx Iñena jira mei jenoka.

\ref CORD19.031
\tx Meita iñede daɨinide, ite, daɨde, ite.

\ref CORD19.032
\tx Rafue daɨi nɨɨ raa ua ɨeredeita ñeiri, rafue ɨenide.

\ref CORD19.033
\tx Daama ua kaɨmare o fɨnoiadɨ nia mei ua yerakɨ kaɨmarede,
daama ñue jiibie o beeɨiadɨ naɨmere dutɨo.

\ref CORD19.034
\tx Nɨɨ afekɨ komekɨdo mei rafue jenoka, nia mei baiga meine abɨdo,
daɨde.

\ref CORD19.035
\tx Jae ua afeno akɨ daɨi einamakɨ yote iadɨ mei ua kaɨ jamairuiga,
ua bie raa kaɨ daɨiñena ɨkoɨ mei fɨgo afenona onoñedɨkaɨ.

\ref CORD19.036
\tx Onoiñena jira mei akɨ daɨi fia ua birui uaina mei ite.

\ref CORD19.037
\tx Ie izoikano mei bie birui dano jae kaɨ komuiya rafuemo komekɨ ua
fakadɨkaɨ, komekɨdo meiñotɨkaɨ.

\ref CORD19.038
\tx Ia abɨna be nɨɨa mei rafuena ite, juzitofe nɨɨ iya, jiibina nɨɨ iya,
yerakɨ nɨɨ ite ua; mei ba iteita, jino jazikɨmo iteita mei jazikɨmoita
kaɨ daɨiri.

\ref CORD19.039
\tx Mei kaɨ ua kaana ua raa ua jɨka ite daɨinide, nano kaɨ ua onoɨmo
ite.

\ref CORD19.040
\tx Ie jira akɨ dɨnomona mei abɨdo meiñoga ja dano kaɨmo komuite,
daɨde, ja kaɨmo dano ua ñuera raana monaite.

\ref CORD19.041
\tx Ie yezika mei ɨko bie izoikano jae ite einamakɨ uai, einamakɨ
komekɨ ɨko bie izoikano ja uuriteita afemakɨmo mei ite.

\ref CORD19.042
\tx Birui kaɨmo iñede mei jenoñedɨkaɨ, ie jira komo ua afeno dano
ñue joonekano uitɨkaɨ.

\ref CORD19.043
\tx Meita afeno ñuefuemo duuide, rairaɨfuemo duuiñede, ikɨrafuemo
duuiñede.

\ref CORD19.044
\tx Nia afeno dano ñue rafue ua joobite, ñue ua afenomo ja ua
daɨizaina izoi ua jiibina uai mei akɨ daɨi uriya, dɨona uai akɨ daɨi
uriya, farekatofe uai akɨ daɨi uriya.

\ref CORD19.045
\tx Ie jira mei jae ua fia uaina ite, ie mei birui ja mei ua ja ua kaɨ ua
jenoyɨno iñede, ite.

\ref CORD19.046
\tx Akie izoikano jae einamakɨ jiibie dute, uhuride, uhuride, ɨkoɨmo ua
raana ja monaide.

\ref CORD19.047
\tx Akie izoikano jae ua einamakɨ jenode, jenode, ja ua baɨna ua
ebirede.

\ref CORD19.048
\tx Mei nɨɨ ua kaɨ iyanona, nɨɨ kaɨ komuiya ua raana, uafuena ite,
ñuefuena ite, afenori yikɨfuena iñede, afenori ɨrafuena iñede,
urifuena iñede, mei ñuera uai jenode, komuiyena, moonaiyena.

\ref CORD19.049
\tx Ie yezika mei ua uabe uriya, uakɨ uriya, ua ua moo komekɨ uriya,
eiño komekɨ uriya ua bene ite, ua naɨmekɨ bene ite, ua fareka
bene ite.

\ref CORD19.050
\tx Ie jira kaɨ ñue ua abɨdo dano jae kaɨ iya izoi eroikano ite uai mei
jɨkadɨkaɨ moomo, eiñomo.