\_sh v3.0  400  Text
\_DateStampHasFourDigitYear

\ref CORD51.002
\tx Akɨ daɨi eikome Konɨɨrahga jito afekakɨ yote:

\ref CORD51.003
\tx Ua jaeide namakɨ zɨuenɨ ua jaiagaɨ imakɨ yoga, bie ua zuruma ua
jiibina arɨ imakɨ ua jiyakɨ.

\ref CORD51.004
\tx Afenori jaeidɨgɨma ua jitokome fɨnorite, ua naaga ua manue
fɨnode, ua dɨga manue fɨnode.

\ref CORD51.005
\tx Ie ja ua baitade ua ja ua aima, ie moo mei fɨnodoga ie uzuma
dɨga, ua jae.

\ref CORD51.006
\tx Ie ja fɨnorite ie moo iena daɨde, moo, o bimonado jiibikongo
uaiyeza, daɨde.

\ref CORD51.007
\tx Ie jira, jii daɨde.

\ref CORD51.008
\tx Ie ja jaaide, jitɨramo jaaide, ja jaaide, ja juzie iodo jaaide, ua
jaaide.

\ref CORD51.009
\tx Jaaidemo iñoduraɨ iyanodo jai jaaikaidemo mena rɨngo iemo bite.

\ref CORD51.010
\tx Ie dɨno ja jakɨnaite, ie komekɨ feeibikaide, ua ɨnɨa izoi ñefikaide.

\ref CORD51.011
\tx Dɨnomona ja naie rɨngo iaɨnguaɨ ja ie fɨɨda iaɨnguaɨ uiga ja.

\ref CORD51.012
\tx Ja naiaɨnguaɨ dɨga jaaide.

\ref CORD51.013
\tx Ua jaaide, ua jaaide ja onoinino ua jaaide, ua ana ba imakɨ jofo
onifenemo ite zuruimo ana ja jaaide.

\ref CORD51.014
\tx Dɨne afe rɨngo iaɨguaɨ ie uite ana batɨnomo.

\ref CORD51.015
\tx Ie afeiaɨnguaɨ uite baɨ ua naɨraɨbɨrɨ fuedamo ie naidaneta ja jofo
jaaide.

\ref CORD51.016
\tx Ie ja ie moona daɨde, moo, daɨde, kaɨngaɨ ɨnina ja daa ɨima
atɨdɨkaɨngaɨ, daɨde.

\ref CORD51.017
\tx Ie moo ua abɨ nɨne faɨgakaide.

\ref CORD51.018
\tx Ua mei naimakɨ naɨraɨ ua fuite, ua daɨifɨrede ie moo
afeiaɨnguaɨna, ¿nɨnona ua ɨima atɨdɨomɨngo?

\ref CORD51.019
\tx Ie jira ja afemɨe daɨde, ¿buu ua jitokome atɨdɨomɨngo?, ¿nɨnena
afe jitokome omɨngo ɨnina omɨngo atɨka?

\ref CORD51.020
\tx Ie jira afeiaɨnguaɨ daɨde, joforue namakɨ ie jitokome atɨdɨkaɨngaɨ,
kaɨngaɨ ɨnina, daɨde.

\ref CORD51.021
\tx ¡Aa!, daɨde, ¡mei jofo atɨ!, daɨde.

\ref CORD51.022
\tx Ie jira ja jofo jaaide.

\ref CORD51.023
\tx Ie moo uaidoga, fɨgo o biya, ñeko, daɨde, ja mei bitɨo, daɨde,
beno kue itɨkue, daɨde, jadie kue jiza iaɨnguaɨ.

\ref CORD51.024
\tx Ja mei omɨngo atɨkaza ekari, daɨde.

\ref CORD51.025
\tx Oni jadɨ kɨnaimo fɨɨiri, daɨde.

\ref CORD51.026
\tx Ie afemɨe fɨɨiñede, jiibibɨrɨmo jaka raɨide, ekaka guiñede jɨaɨ, mei
ziiñoza jɨaɨ.

\ref CORD51.027
\tx Ie jira, mei kue ua beno itɨkue, ja ua nana imakɨ fuiya mei kue
daa beno fɨebiya kue jiza menade dɨga, daɨde.

\ref CORD51.028
\tx Ie jaka ua jitaidɨkuemo mei bitɨo, daɨde.

\ref CORD51.029
\tx Afemɨe, ¡aa!, daɨde.

\ref CORD51.030
\tx Ieita mei kue ua jiibie beeɨyena bitɨo, daɨde, kue ua jiibikongo
oyena bitɨo, daɨde, kue ɨmuiforo oyena bitɨo, daɨde, kue ua jiibie
o guayena bitɨo, daɨde.

\ref CORD51.031
\tx Fɨgora, daɨde.

\ref CORD51.032
\tx Oni jadɨ kɨrɨgaɨnɨaɨ iteza, daɨde, ja mei bitɨoza, jiibie o uairi,
daɨde, jino jadɨnomo ite naizodo jaaitɨo, ie nano bairi jaka ua ja
jiibire iteza, daɨde, ua kɨruiñeitɨoza, fiia kubeitɨoza.

\ref CORD51.033
\tx ¡Aa!, daɨde.

\ref CORD51.034
\tx Ie naimɨe, naie jitokome, ie guamaduaɨ, ua ie raanɨaɨ, ie yerakɨ, ie
jiibikuiro ie rokafe anamo jaka ua ie doferamo ie joonega.

\ref CORD51.035
\tx Meita jaka rokafe ana uide naari jaaide mei.

\ref CORD51.036
\tx Ie ja afemɨe daɨi daɨna ja kɨrɨgaɨ yɨɨnota ja mei jaaide.

\ref CORD51.037
\tx Jaaide, jaaide, ja dukɨide, nɨnomo ua fiia ua jiibire aiya ua fiia
nɨnomo.

\ref CORD51.038
\tx Meita ua, bie ba jɨaɨe jiibie, daɨde, kaɨ bie ua dukabiga bie jɨaɨe
ie, daɨde, kaɨmo ite bie ua jɨaɨe ie, daɨde.

\ref CORD51.039
\tx Ie ua okana uite, ua okana daberie okana uite, ua okana uite, ie
jaka ua ofiñede.

\ref CORD51.040
\tx Ie ofiñena jira ua kɨruikana uite, ua kɨruikana uite, ja mei ua mei
jɨaɨe ɨkoɨe ja ua idozi dɨga dɨkoɨzite naari ie oga.

\ref CORD51.041
\tx Ie ja bite, bite, io ana ie ɨmuiforo ota jaka bite, ie ja riide.

\ref CORD51.042
\tx Daɨde ua, ñeko ja zibe kue bonokaza o beeɨiri, daɨde.

\ref CORD51.043
\tx Jii, daɨde.

\ref CORD51.044
\tx Ie afemɨe ja yerakɨ ota mete, jiibie dute, ja komekɨ fakade, ieita ja
jiibie beeɨ-beeɨde.

\ref CORD51.045
\tx Ie fakaize ie jɨfai ua mei zuruma jiibibɨrɨmo raɨide, raɨidemo ja jɨaɨ
ua buinaimaza kakareide.

\ref CORD51.046
\tx Kakareidemo ja baie jitokome moo ie uzuma ie nabaitɨaɨ dɨga ja
afemɨe merɨdoiyado uuritɨmakɨ, uuritɨmakɨ, jenodɨmakɨ, ¿buu daɨi
zefuiya?, daɨdɨmakɨ, ¿ua nɨne jaaide?, ¿fiodaite?

\ref CORD51.047
\tx Iena ja kakade, ia naimɨena naɨ raiñede jaka, ie ja afemakɨ uriyana
ja kakade.

\ref CORD51.048
\tx Ja daɨde, ɨko kue jiza iaɨnguaɨ kue abɨmo rafue ote, daɨde.

\ref CORD51.049
\tx Ua beeɨde, ua beeɨde afe naimɨe, ua beeɨde.

\ref CORD51.050
\tx Beeɨdemo ie onoyɨmo ja itabikaide ibiaɨ dɨga.

\ref CORD51.051
\tx Ie afebe kunuda, kunuda, ie afe ibiaɨ zibemo dotajano ja ie
afedozi ota, ie faikɨdo rɨaitajano rɨaitajano ua ie moigaɨ abɨmo ua
rɨire ferɨnota ie dataka.

\ref CORD51.052
\tx Ieita beeɨde, ja kaigaide.

\ref CORD51.053
\tx Ja arɨ ota ja guate, guatemo ja afeɨe ua ie jɨfai zuruma ja
jaaiyano ja juaɨ taite, juaɨ taite, taite, taite.

\ref CORD51.054
\tx Ieita guajano ja, daɨi ñeta ja ɨmuizaɨ jobaide.

\ref CORD51.055
\tx Ie jira afemɨe daɨde, jadɨ jɨfai, daɨde, ja mai faiano.

\ref CORD51.056
\tx Ie jira ja faianote, naie ekɨ afemɨe raɨide.

\ref CORD51.057
\tx Ie jira daɨde, ja bie ua kaɨmakɨ ua uaidotɨkue, o mei ua ja bitɨo
ua kue ñekorena mei iitɨo; ie jira imakɨ uaidotɨkue o imakɨ
onoiyena, o naimakɨ kɨoiyena.

\ref CORD51.058
\tx Fɨgora, daɨde.

\ref CORD51.059
\tx Iemo ja bite.

\ref CORD51.060
\tx Ie naimɨe ua ie jɨfai dɨga ie iya fakai ua kome mei.

\ref CORD51.061
\tx Daɨi ua ja ua ie uaidoga ie naɨraɨna mameide okainaɨaɨ ja
bitɨmakɨ, ua zuruyarina ie ɨfoide, ja ua jofo uaide.

\ref CORD51.062
\tx ¿Bueri tairaɨ-tairaɨdɨo, tairaɨ-tairaɨdɨo?, daɨde; jofo uaida jaka bɨgɨ
juaioikabide.

\ref CORD51.063
\tx Ie naimɨe daɨde, ua mei ite rafue, daɨde, jadɨ raɨi, daɨde.

\ref CORD51.064
\tx Raɨide, eroidemo, ¿oni jadie buu?, daɨde.

\ref CORD51.065
\tx Bie ua mei kue ñekore, daɨde.

\ref CORD51.066
\tx Ie, mei omoɨmo kue akatayena, omoɨ kɨoiyena, jɨaɨ ieri omoɨ
uaidotɨkue.

\ref CORD51.067
\tx Ie eroide, afe zuruyari eroidemo mei kome, ie ja ua bɨgɨ juaiñota
ua butajide.

\ref CORD51.068
\tx Ieri afe jɨfai dɨnena, dama ite, daɨde, ua kue abɨmo rafue o oiza,
daɨde.

\ref CORD51.069
\tx Jadie ua naɨraɨ kaɨ ua nabaitɨaɨ fuitade, kɨoiakañedɨkue ie uiekona,
daɨde.

\ref CORD51.070
\tx Dama ite, daɨde.

\ref CORD51.071
\tx Iemo ja janayari bite, daaje izoi jaka ñete, ua ie jaka dano ie
butajide.

\ref CORD51.072
\tx Dama ite, daɨde, kue abɨmo rafue o oiza, daɨde, daaje izoi jaka
daɨde.

\ref CORD51.073
\tx Jadie ua naɨraɨ kaɨ uzutɨaɨ fuitade, daɨde, ie uiekona
kɨoiakañedɨkue, daɨde.

\ref CORD51.074
\tx Ie emodomo ja ua edoɨko bite, dano nazemona jaka ikɨrikano bite
bɨgɨ dɨga ua juaioikabide ua maɨtajide.

\ref CORD51.075
\tx Ie jira afemɨe, dama ite, daɨde, kue abɨmo rafue o oiza, daɨde.

\ref CORD51.076
\tx Jadie uiekona kɨoiakañedɨkue, kaɨ naɨraɨ fuitade, daɨde.

\ref CORD51.077
\tx Ie emodomo ja ua jirako bite, ua daaje izoi jaka ñete.

\ref CORD51.078
\tx Ie emodomo ja ua yauda bite, ua jaka onoikaide, jaka daaje uai
jɨaɨ yote.

\ref CORD51.079
\tx Ua ieze bite, ua ieze jɨaɨno bite, ua daɨi, ua daɨi, ua daɨi ja nana
ua ofide, ua fɨebiñede.

\ref CORD51.080
\tx Ua iraɨnomo ja nofaɨngo bite, daaje izoi jaka daɨde.

\ref CORD51.081
\tx Ie ja ua nana raɨidɨmakɨ ua nejedɨmakɨ.

\ref CORD51.082
\tx ¿Ja ua nɨɨmakɨdɨomoɨ?, daɨde.

\ref CORD51.083
\tx Jɨɨ, daɨde, nɨɨedɨkaɨ.

\ref CORD51.084
\tx Ie ja ie jɨfai daɨde, bie ua joforue namakɨ ie ua jito kue jiza
iaɨnguaɨ atɨka, iaɨnguaɨ ɨnina; kaɨ naɨraɨ fuite, daɨde, mei ie ua
meidoyena ie ifomo ua komuiyena, ie jira omoɨ uaidotɨkue omoɨ
kɨoiyena, omoɨ onoiyena, mei jadie izoikana ite uai mei iya kaɨmo,
daɨde.

\ref CORD51.085
\tx Ie jira ja zuruyari daɨde, kaɨ mei jɨkanoitɨkaɨ afemɨe ua ¿nɨɨzie ie?,
daɨde, ¿nɨɨmakɨ imɨe?, daɨde.

\ref CORD51.086
\tx Ie mei kaɨ naɨraɨ fuitade imakɨ ie izienia mei kue onodɨkue, jɨaɨ
daɨde; imɨenia jabe mei benokoni ua fɨebite ja menakaño jaaiñeite,
daɨde.

\ref CORD51.087
\tx Ie jira ja afemɨe jɨkanote, ¿o izie iedɨo?, daɨde.

\ref CORD51.088
\tx Ieñedɨkue, daɨde.

\ref CORD51.089
\tx Ie jira ja jɨaɨmɨe dane jɨkanote, ¿o izie iedɨo?, daɨde.

\ref CORD51.090
\tx Ieñedɨkue, daɨde.

\ref CORD51.091
\tx Ua jɨkanotɨmakɨ.

\ref CORD51.092
\tx Ie mei jɨaɨmɨe jɨkanote, ¿o izie iedɨo?, daɨde.

\ref CORD51.093
\tx Ieñedɨkue, daɨde.

\ref CORD51.094
\tx Ua daɨi jɨkanokana uitɨmakɨ, ua nana jɨkanotɨmakɨ, ua daɨi, ua
daɨi, afemɨe dane jaka, ieñedɨkue, daɨde, ua ieñedɨkue, daɨde.

\ref CORD51.095
\tx Ua daɨi, ua iraɨnomo ja nofaɨngo daaje izoi jaka jɨkanote.

\ref CORD51.096
\tx ¡Ebe!, daɨdɨmakɨ.

\ref CORD51.097
\tx Ie jira meine abɨdo dane ja zuruyari jɨkanote, ¿o nɨɨe naɨraɨdɨo?,
daɨde.

\ref CORD51.098
\tx Ja ua ñue mei jɨkanote, jae ba ie fɨeni jɨkanote; iedo mei ua
naimɨe mei ziiñoza jaka jɨaɨ ua daɨi imakɨ komekɨ dobaiñote, ie
izoi ua nano nana daɨi jɨkanotɨmakɨ, iedo ua baiñedɨmakɨ.

\ref CORD51.099
\tx Ie jira ja batɨnena ja jɨkanote, ¿nɨɨzie iedɨo?, daɨde, ¿nɨɨmakɨ
naɨraɨdɨo?

\ref CORD51.100
\tx Daɨi jɨkanua fakaize afemɨe yote, kue bie doriaɨ iedɨkue, doriaɨ
naɨraɨdɨkue, daɨde.

\ref CORD51.101
\tx Ie jira naimakɨ komekɨ fakade.

\ref CORD51.102
\tx ¡Aa!, daɨdɨmakɨ, ua nana, ua doriaɨ naɨraɨ ua kaɨ ua uzutɨaɨna
fuitañede, daɨde, kaɨ naɨraɨna ua fuitañede, daɨde; fɨgora,
daɨdɨmakɨ.

\ref CORD51.103
\tx Ie mei ua izie iedɨo, imakɨ iedɨo daɨdɨonia mei ua beno jaka nia
fuitɨo, iena daɨde.

\ref CORD51.104
\tx Ero bene erokai, daɨde, be ie naɨraɨ fuitaka izuru, daɨde, be ie
naɨraɨ fuitaka izuru, daɨde, be ie naɨraɨ fuitaka izuru, daɨde, be ie
naɨraɨ fuitaka... ua daɨi, jaka jofo ero.

\ref CORD51.105
\tx Bifo be zuruyari izuru, bifo ua janayari izuru, edoɨko izuru, jirako
izuru, kɨto izuru... ua daɨi, ua daɨi, bene baie iraɨnomo ua zuruma
izurumo nɨɨ baie zuruma ite, ja ie jiza dɨga.

\ref CORD51.106
\tx Meita jofo eromo imakɨ fanaizɨga ɨdakuaɨ ja ua meino ua ba
joreño ɨnizaruaɨ ua feifɨrena izoi feiede, be imakɨ eɨkuaɨ ja baie ba
afe ua zuruma fate naɨraɨ fuitaka.

\ref CORD51.107
\tx Bie izoiya jira, daɨde, ie mei baie mei ua iyaɨnɨ fɨebiya, ie mei
baie ua fiia naɨraɨna mameidɨno fuiya.

\ref CORD51.108
\tx ¡Aa!, daɨde, mei ñue ite, daɨde, meita ja ua onodɨkaɨ, daɨde, ja
kakadɨkaɨ, daɨde.

\ref CORD51.109
\tx Ie jira mei ie jɨfai daɨde, ja mei kakadɨomoɨ, ja kɨodɨomoɨ, ja
onodɨomoɨ, beno mei iite.

\ref CORD51.110
\tx Ua ie makaadɨ nɨno mei omoɨ kɨoadɨ ua ebe uaina yoñeitɨomoɨ,
daɨde, omoɨ ua zɨda uaina yoñeitɨomoɨ, omoɨ bɨgɨ uaina
yoñeitɨomoɨ, daɨde, ja mei kɨodɨomoɨ, ja kakadɨomoɨ, ie ua dorifo
ie naɨraɨ, daɨde, dorifo naɨraɨ kaɨ ua uzutɨaɨna fuitañede, kaɨ
ɨfokɨna oñede, kaɨ izido oñede.

\ref CORD51.111
\tx Ie jira afemɨe ja daɨde, ua onoitɨomoɨza, daɨde, bie ua jitokome
beno iya kue jiza iaɨnguaɨ atɨka, daɨde, akɨ dɨnomo kue jiza
iaɨnguaɨ kue abɨmo rafue oteza, daɨde, erokai, omoɨ kakarei,
daɨde,

\ref CORD51.112
\tx Kakareidemo kaifo batɨnomo afe jitokome moo ie uzutɨaɨ ie
nabaitɨaɨ dɨga ie jaeragɨma einamakɨ ja afe jitokome jaaiyana ja
kɨodɨmakɨ, ja kakadɨmakɨ.

\ref CORD51.113
\tx Ie ja jiibie dutɨmakɨ, daɨdɨmakɨ, ua meine abɨdo ie uiyanomo mei
jooneia fɨgoite, ua uire jitɨ, daɨde; ie mei uiyano mei jooneñenia
jabe ua zuruaɨ fuite, daɨde.

\ref CORD51.114
\tx Ja nana bie ua zurubani ja ezizaiye, daɨde, ja ireaɨaɨ ezizaiye,
daɨde, takofonɨaɨ ezizaiye, daɨde, ja ua zɨdaanɨaɨ ua fɨnodɨmakɨ,
ua bɨgɨnɨaɨ ua fɨnodɨmakɨ, ja uuritɨmakɨ, iena ja kakadɨmakɨ.

\ref CORD51.115
\tx Akie izoi iteza, daɨde, ua daɨi ja mona monaioikaide.

\ref CORD51.116
\tx Ie jira ja zuruyari daɨde, bie izoi mei kaɨ itɨkaɨ beno, daɨde, nɨɨe
bie ua o jɨfaitɨaɨna ua kaɨ mameidɨkaɨ, jɨaɨ daɨde.

\ref CORD51.117
\tx Ie mei ja bitɨo fɨgora, daɨde, jadɨ kaɨ rɨngoza iaɨnguaɨ iteza,
daɨde; ie jira ja ua o ua kaɨna kɨodɨo, kaɨ uiekona kɨodɨo, kaɨ o
uiekona kɨodɨkaɨ, ie jira o kakaiyena mei ua kaɨmataikɨkaɨ,
iobitɨkaɨ, ɨfueritɨkaɨ, ja mei roitɨkaɨ, daɨde.

\ref CORD51.118
\tx Ie ja naidarozidɨmakɨ, ie bɨgɨ juaiñotɨmakɨ, imakɨ ja rotɨmakɨ.

\ref CORD51.119
\tx Dɨno jaka ua naidaikana zuruyari roga, iemo zaitɨmakɨ ja nana ua
mei bɨgɨmo ite ua bie ua jino bizikɨ okaina ua ie ua naanɨ, ua ie
iyaɨnɨ ja rotɨmakɨ:

\ref CORD51.120
\tx Tamɨmɨ tamɨmɨ

\ref CORD51.121
\tx Tamɨmɨ tamɨmɨ

\ref CORD51.122
\tx Tamɨmɨ tamɨmɨ

\ref CORD51.123
\tx Tamɨmɨ tamɨmɨ

\ref CORD51.124
\tx Tamɨmɨ tamɨmɨ

\ref CORD51.125
\tx Daɨdɨmakɨ.

\ref CORD51.126
\tx Nɨnomo fiia ua kaiñɨ-kaiñɨkɨdɨmakɨ ua jaka ie ba ie jogobemo
rii-riide ua zaitɨmakɨ, ua zaitɨmakɨ, ua rotɨmakɨ, ua daɨi ja
yɨɨikaidɨmakɨ.

\ref CORD51.127
\tx Mai, daɨdɨmakɨ.

\ref CORD51.128
\tx Imakɨ ja monaikana ja jaaide, jaaide.

\ref CORD51.129
\tx Ie ja jaaiya mei ie jiza iaɨnguaɨ baɨ uaidote daɨde, kue abɨmo
rafue otɨomɨngo, ie ua eroidɨkuemo ja ua fɨeni ja kɨoide, daɨde.

\ref CORD51.130
\tx Ie jira mei omɨngo uaidotɨkue baɨ, daɨde, ie jira kue uai
ɨɨnotɨomɨngoza, daɨde, omɨngo ɨɨnoiadedɨ mei ua bie izoi jaka
iitɨkaɨ, ie mei omɨngo ɨɨnoñenia mei ua fuitɨkaɨ, daɨde.

\ref CORD51.131
\tx Bie jitokome moo ie uzutɨaɨ ie nabaitɨaɨ ie naɨraɨ dɨga mei ja kaɨ
eroikana zɨda fɨnodɨmakɨ, ja ua zurubani imakɨ fɨnoka, ua irea
imakɨ fɨnoka, takofo fɨnoka, ua guamado fɨnodɨmakɨ, ua bɨgɨnɨaɨ
nana fɨnodɨmakɨza, daɨde.

\ref CORD51.132
\tx Akie izoikana iteza, daɨde, meine abɨdo omɨngo izajiri, daɨde.

\ref CORD51.133
\tx Jaka ɨɨnoñede.

\ref CORD51.134
\tx Ie jira uitɨomɨngoza, daɨde, omɨngo atɨanomo izajitɨomɨngoza.

\ref CORD51.135
\tx Ie jira afemɨena daɨde, mei jaaitɨo meine, daɨde, akie izoideza,
daɨde.

\ref CORD51.136
\tx Ie ja ɨɨnota afeiaɨnguaɨ ja uite, ua uite, ua uite, ua ja ianori ite
afeiaɨnguaɨ ua fɨɨano.

\ref CORD51.137
\tx Ie mei ja afeiaɨnguaɨ ua dɨnena ua afemɨe ua yaguikana uite, ua
afeiaɨnguaɨ nɨkɨdokana uite, meita afemɨe jaka jeire oñede.

\ref CORD51.138
\tx Ua daɨi, ua daɨi, ua zadaidokana uite, ua yaguikana uite, meita
jaka afemɨe jaka jeire oñede.

\ref CORD51.139
\tx Ua daɨi, ua daɨi riide.

\ref CORD51.140
\tx Dɨno fɨeda ja naiaɨnguaɨ meine jaaide.

\ref CORD51.141
\tx Iemo ja naimɨe jenodɨmakɨ naaga naizodo ua jɨɨrikana ua
jɨɨdaijɨɨdai ua jenodɨmakɨ, ua bitɨmakɨmo ua ba jino jɨka jaaide
iodo ua ie jaaiya iodo jaaidɨmɨe meine bitemo io anamo naidaide.

\ref CORD51.142
\tx Jaka jɨaɨ uriñede, nɨei daɨiñede, ua jakɨnaite.

\ref CORD51.143
\tx Ie yɨɨnota ja imakɨ uiga.

\ref CORD51.144
\tx Ie ja ie uzutɨaɨ jiibibɨrɨmo manode, dɨobedo imakɨ fuuka, nana, ie
ja jiyona.

\ref CORD51.145
\tx Ie jiyuano ja itemo, iemo uibikaide, ua nɨkaɨriya izoi iemo ite.

\ref CORD51.146
\tx Ie daɨde, ua kue ua ana batɨnomo ua jaaiyanomo ua jiibie kue
uaiya kue beeɨamo, kue moigaɨ ifuemo kue uitaka, jiibidozi ite
izoide.

\ref CORD51.147
\tx Ie meyenota eroidemo ua ite.

\ref CORD51.148
\tx Ie jira afe ja ie jino uita faɨtade.

\ref CORD51.149
\tx Faɨtade ie jaka mei-meiñode, ja zokade ua nɨno.

\ref CORD51.150
\tx Ie ja ua anafe bie ote.

\ref CORD51.151
\tx Ua ota ja beeɨde, daama ie duga; ieze ua dukana bite daama.

\ref CORD51.152
\tx Ie mei baie ie moo ie nabaitɨaɨ ie uzutɨaɨ jaka ua jino ba jazikɨ ie
jiibina nia dutɨmakɨ.

\ref CORD51.153
\tx Imakɨ jaaifɨrena mei daɨi jiibie fɨnoda daama dufɨrede, jaka
yoñede.

\ref CORD51.154
\tx Ie iyino ja imakɨ jiibigoɨ eromo fɨebikaiya ja ua daaɨi jeerie ie
beeɨkana jaaiya muidomo.

\ref CORD51.155
\tx Ie jira ja jɨkanote, ie afemɨe ja mei jɨkanoga yote, ua kue
feeireiyanomo kue baiga ua dɨnona ua fiia igai kunuda kue atɨka,
faɨtaka ie jiibie mei kue dutɨkue, daɨde.

\ref CORD51.156
\tx Ie jaka yoñede, fiia akɨ daɨi jaka daɨde.

\ref CORD51.157
\tx Ie jira baie ja faɨnokaiyano ja afeɨe zuruma jiibie ja mei
komuideza ja afe dutɨmakɨ.

\ref CORD51.158
\tx Ua daɨi, ua daɨi itɨmakɨ

\ref CORD51.159
\tx Ua ie muidomo ja afemɨe eikomena jaaide, ua ja ua fiodaiakana
uiekodo ja naino ja yote.

\ref CORD51.160
\tx Ja nɨɨ bie ua kue yogakakɨ ja yote.

\ref CORD51.161
\tx Ie jira ja afemɨe ja afemakɨna daɨde, biemona kaɨ meifene bite
naɨraɨ bie jiibie duitɨmakɨ, biena jiibina reitɨmakɨ.

\ref CORD51.162
\tx Akɨ dɨnomona kue arɨ atɨkaza, daɨde, kue arɨ ogaza, daɨde,
onidɨnomona kue oga, atɨnidɨnomona kue atɨkaza, meita biemona
kaɨ meifene bite naɨraɨ biena jiibina reitɨmakɨ, bie jiibie duitɨmakɨ,
daɨde ja oni fiodaiya.

\ref CORD51.163
\tx Afenomo ja afekakɨ afemɨe ja yote.

\ref CORD51.164
\tx Akɨ dɨnomo fuite.

\ref CORD51.165
\tx Eikome Ruiredɨgɨ afe jiibina imakɨ fɨnua kue jɨkanua jira akɨ daɨi
yote

\ref CORD51.166
\tx Afekakɨ ua ie yua ie jira afe eikomemo naie ua jiibina jɨkanotɨkue.

\ref CORD51.167
\tx Ie jira mei afe eikome mei mamekɨ mei Ruiredɨgɨ, oni ba Atena
naɨraɨ mei.

\ref CORD51.168
\tx Ie jira naimɨe mei raite, kue naie jiibinana kɨodɨkue, naie jiibinana
dutɨkue, jɨaɨ daɨde.

\ref CORD51.169
\tx Izoide daɨde, kaɨ dɨbenemo mei naie jiibie kaɨ mei dutɨkaɨ,
buinaima zuruma jiibina arɨ kaɨ jaeidɨgɨma oga ie jiibina mei kaɨ
fɨnodɨkaɨ, daɨde.

\ref CORD51.170
\tx Ie izoikana jae mei ite kaɨ bie fɨnoka jiibina, daɨde, ie ja bene ua
bie Peru biya fakai ja ua mei afeno ua naɨraɨ ua fuite naɨraɨ, nana
jaaide, dɨnomo ja ua afe jiibina ja mei ja ua meidoɨna jaaizɨte, ua
jazikɨna jaaizɨte, dɨnomo ja ua fuite, daɨde. 

\ref CORD51.171
\tx Ie jira afenori kaɨ jiibina ua ba feeiya izoi feeide, fuiya izoi fuite,
daɨde.

\ref CORD51.172
\tx Ie mei birui ja kaɨ bie bebene ie jiibina uita kaɨ ja dane jiibie
dutɨkaɨ.

\ref CORD51.173
\tx Ja meita bie ja ua bibene ie bie jiibina mei kaɨ birui ja dane meine
fɨnodɨkaɨ, daɨde.

\ref CORD51.174
\tx Ie mei ua jaeidɨgɨma zuruma jiibie mei fɨnodɨkaɨ, zuruma jiibie
dutɨkaɨ, daɨde.

\ref CORD51.175
\tx Ie mei birui ja mei bibene bie ua uitoto ie jiibina dane kaɨ
fɨnodɨkaɨ, daɨde.

\ref CORD51.176
\tx Ie mei jae kaɨ jiibina, mei zuruma jiibina, daɨde, afemɨe daɨi yote,
afe eikome.

\ref CORD51.177
\tx Akɨ daɨi afekakɨ yua jira ua jɨkanotɨkue.

\ref CORD51.178
\tx Ie jira mei ua bie ua yoga ba ikakɨ mei ua ba fiia ua ba yogakakɨ
izoiñede.

\ref CORD51.179
\tx Ie mei bie jae mei afemakɨ ba ua jiibina imakɨ ua, arɨ imakɨ ua,
imakɨ fɨnua, ie ua uai mei afe ua ba ua ana ba buinaimamona arɨ
imakɨ ua, arɨ imakɨ monaitaja.

\ref CORD51.180
\tx Ie ñeta afe jiibie mei fɨnodɨmakɨ.

\ref CORD51.181
\tx Ie uafuena mei afenori ite.

\ref CORD51.182
\tx Ie jira mei afenori afemakɨ ua ba raana ite.

\ref CORD51.183
\tx Ie mei ja ua be daɨi be Peru mei iya bibenemona ja bene bie kaɨ
jiibina uita, ja afe dane fɨnodɨmakɨ.

\ref CORD51.184
\tx Ie ja kaɨ jiibina ja dutɨmakɨ.

\ref CORD51.185
\tx Ie bie daaje jiibie jɨaɨ kaɨ dutɨkaɨ, beno.

\ref CORD51.186
\tx Akɨ daɨi afeno jɨkanotɨkue afe eikome yote.